Коръән мобиль кушымталарының кайберләрендә хаталар күп, дип хәбәр итә Истанбулдан “Анадолу” агентлыгы. Бу хакта исә Бөтендөнья ислам лигасы карамагындагы Коръән белгечләре Халыкара оешмасы (Рабита әл-Әлам әл-Ислами) кисәткән.
Apple Store, Google Play һәм башка сайтлардан һәм онлайн-кибетләрдән алынган Коръән укырга мөмкинлек бирүче кайбер мобиль кушымталарларда хаталар барлыгы ачыклаган. Хаталарга зарланып, дистәләгән кешедән мөрәҗәгать килгән. Аерым алганда, мәсәлән, quran 360 кушымтасында аңлатмаларда хаталар табылган, ә Kur'an-ı Kerim кушымтасында берничә аять төшереп калдырылган. A.S.H. компаниясе тәкъдим иткән Kur'an кушымтасында да ялгышлыклар бар икән.
Коръән белгечләре ышанычлырак чыганаклардан файдаланырга тәкъдим итеп, mushaf-services.qurancomplex.gov.sa, quran.ksu.edu.sa, www.quranflash.com кебек чыганакларны киңәш итә, дигән мәгълүмат ирештерде "Татар-информ".