«Ярдәм” мәчетендә ТҖ МДН волонтерларын котладылар

Казандагы “Ярдәм” мәчетендә Татарстан Җөмһүрияте мөселманнары Диния нәзарәте (ТҖ МДН) волонтерларын котлау булды.

ТҖ МДНнең Яшьләр бүлеге җитәкчесе Айнур Әхмәтшин Татарстан мөфтие Камил хәзрәт Сәмигуллин исеменнән республика ифтарын үткәрүдә актив катнашканнары өчен волонтерларга рәхмәт белдерде.

Айнур Әхмәтшин волонтерлар алдында тантаналы рәвештә чыгыш ясады, ул яшьләрне “Казан-Арена”да республика ифтарын уңышлы үткәрүләре белән котлады. Яшьләр бүлеге җитәкчесе социаль проектларны тормышка ашыруда, яшьләрне ватанпәрвәрлек рухында тәрбияләүдә һәм сәламәт яшәү рәвешен популярлаштыруда бергәләп эшләрбез дигән өмет баглады.

“Ярдәм” мәчете матбугат хезмәте