Әлмира Әдиатуллина: “Рәшидә Исхакый исемендәге укулар даими булачак”

Казанның Рәшидә Исхакый яшәгән Тынычлык (Мирный) бистәсендәге данлыклы татар абыстае йортында аның исемендәге укулар булып узды.

“Мөслимә” иҗтимагый оешмасы рәйсәсе Әлмира ханым Әдиатуллина сүзләренчә, күп кенә дини китаплар авторының һәм оста вәгазьченең өендә аның туганнары, шәкертләре вә Татарстанда дини эшчәнлек алып баручы имамнар җыелды. Алар Рәшидә абыстайны искә алдылар, рухына багышлап дога кылдылар, Коръән укыдылар.

“Минем уйлавымча, Рәшидә Исхакый исемендәге укулар даими булачак. Бу чараны без мөмкин кадәр ешрак үткәрергә җыенабыз. Бәлки ул ярты елга бер тапкыр, ә бәлки ай саен уздырылыр. Бу мәсьәләне Рамазан аеннан соң җентекләп тикшерәчәкбез. Без аның эшен дәвам итәргә телибез”.-диде Әлмира ханым.

Исегезгә төшерәбез: күренекле татар вәгазьчесе Рәшидә абыстай Исхакый быелның 22 апрелендә 93 нче яше белән барганда вафат булды.